我若是一欉樹仔 @ 大武山文學創作協會的部落格

我若是一欉樹仔 / 劉佩桂

我捌聽過一个故事：古早，古早，有一个國王，伊的花園內底，有一欉蘋果樹，三十年才開花一擺，一擺才生三粒的金蘋果，國王不准任何人倚近伊心愛的蘋果樹，所以這欉蘋果樹一直是真寂寞（tsi̍k-bo̍k），一點仔都袂快樂……

我感覺這欉蘋果樹真孤單、真稀微。我定定咧想：我若是一欉樹仔，我絕對袂想欲做一欉會生金蘋果的樹仔，我干焦想欲做一欉平平凡凡的樹仔。

我若是一欉樹仔，我一定是一欉懸懸懸的大樹，一伸勻就摸著天頂的雲，風逐工攏會來佮我做伴，鳥仔嘛會逐工飛來我遮唱歌，天頂的雨水三不五時仔就會來替我洗身軀。學校是阮兜，我的正手爿佮我仝款，是一欉茄冬樹，左手爿是一欉烏板樹，跤邊有青-ling-ling的草仔佮芳貢貢的花，遮的攏是我的好厝邊、好朋友。有當時仔田嬰佮蝶仔嘛會來揣阮開講做伴，所以，我雖然毋捌看過學校外口的世界，人我佮阮遮的好朋友，捌的代誌閣袂少呢！

逐工的透早，天頂的日頭阿伯是上早起床的，我的鳥仔朋友會佇我的耳空邊唱歌叫我嘛好起床矣！紲落來，我就會看著小朋友揹著冊包，一个接一个來學校讀冊。上課的時陣，我徛踮運動場的邊仔，遠遠就有聽到小朋友讀冊的聲音，有當時仔會吟詩唱歌，這个時陣，我嘛會綴著的讀冊聲，共我的頭殼，幌過來閣幌過去，聽甲真歡喜，邊仔的茄苳樹小姐，定定呵咾我是一欉上有學問的樹仔。其實，我上期待的是下課的時間，逐擺下課的鐘仔聲若霆，小朋友就會傱出來𨑨迌（tshit-thô），看走標、拍球佮幌韆鞦，實在真趣味。上好耍的是小朋友若欲耍覕相揣，做鬼的人覆佇我的身軀頂，我著會擽（ngiau）甲擋袜牢，「唉呦喂呀！真正有夠擽的啦！」「哈哈哈！實在有夠擽的啦！」誠可惜，遮的小朋友毋知影我嘛佮耍甲遮爾歡喜，顛倒是我跤邊的圓仔花妹妹，笑我是一欉上驚擽的樹仔，講甲我的面煞紅起來呢！