我的故鄉－大武山文學創作協會的部落格

我的故鄉 / 劉佩桂

若準講有一日，我去到國外，搪著一个鼻仔啄啄啄、目睭濁濁濁的「阿啄仔」，問我的故鄉佇佗位？我會真驕傲共伊講：「我的故鄉佇臺灣，臺灣就像一粒蕃藷，土地無蓋闊，毋過因為𠢕生湠，四界攏有蕃藷仔囝，我就是上有福氣的臺灣人啦！」毋若按呢，我閣會順紲邀請伊來咱臺灣踅踅看看咧：咱臺灣美麗的風景四界攏有底看，阿里山、日月潭、澎湖、蘭嶼佮小琉球，有懸山、有平洋，上山看山景，坐船看海湧，閣有彼號電腦科技嘛是世界第一等。啊若講著水果是滿滿是，一年四季予你食袂離，有這款的好所在，絕對欲予彼阿啄仔呵咾咱台灣是世界的『Number One』啦！

啊若是今仔日在座的好朋友問我的故鄉佇佗位？我欲來共各位介紹講我的故鄉佇萬丹。萬丹就佇屏東縣較欲倚中心的所在，佇三百外冬前，咱的先民留落來一句話：「屏東較早是阿猴，萬丹是街仔頭。」是按怎講「萬丹是街仔頭」咧？因為萬丹是上早有成做一條街仔予人做買賣的所在，其他附近鄉鎮的發展，攏比萬丹差不多慢有七、八十冬，毋才講「萬丹是街仔頭」。毋但按呢，萬丹的鯉魚山會滾水，阮遮的人攏叫伊做「滾水仔山」，媽祖會承炸彈展神威，閣有彼號老教堂的耶穌、萬安古地的土地公佮街後的上帝公，眾神攏總會來鬥保庇，所以萬丹是一塊大福地啦！

人講：「福地福人居，福人是居福地」，講著萬丹的鄉親，人人骨力閣拍拚，合齊閣仝心，所以萬丹的土地會出黃金。無啦！我的意思是講萬丹的土地上有肥，種出來的稻仔飽穗閣粒粒圓，四時的菜蔬、水果滿滿是，啊若名聲對臺灣尾衝甲臺灣頭的就是紅豆，講著紅豆這號物，無論是老大人抑是囡仔嬰，人人攏嘛會食得；上重要的是，萬丹的紅豆，囡仔來食快快大，老人來食助消化，而且根據醫學的研究：紅豆補氣兼補血，你看阮萬丹人紅膏赤蠘有元氣，攏嘛靠紅豆這一味，所以毋才講萬丹是紅豆的故鄉。

最後，我欲講的是：有臺灣，才有我美麗的故鄉、美麗的家園，嘛才有幸福的我佮厝內的每一个人。我愛臺灣這塊土地，我愛故鄉的一切。今仔日我就講到遮，多謝逐家。