大武山文學創作協會的部落格

      考試的時陣        /  劉佩桂

會記得讀一年的時陣，考試對我來講，就親像食糕仔仝款，素素仔爾，干焦考兩科，凊彩考就有兩百分。講實在的，毋是我咧臭彈，考試對我來講，袂輸「桌頂拈柑」遐爾仔簡單。

想袂到「花無百日紅，人無千日好」，三年的第一擺考試，我共款是「新娘轎來矣，才想欲縛腳」當等時到日到才讀甲步罡踏斗！結果考試的時陣，國語考試單仔一分落來。啊！題目哪會遮爾濟？斟酌共看，題目閣不止仔深，有一寡仔字，我按怎想就想袂出來，這个時陣，我雄雄想著電視manga內底的『大雄』，我想講我哪是伊，共哆啦A夢討一枝萬能筆，啊不就啥物題目攏考我袂倒囉！我那作夢，那偷偷仔看別的同學。嘿～班長目頭結結佇遐咬鉛筆，可見伊嘛袂曉寫，閣有人佇遐抓（jiàu）頭殼，抓甲頭鬃欲落了矣，猶閣咧抓，嘛有人兩蕊目睭一直看天篷，毋知咧想啥，唉！想袂到三年的考試是遮硬篤，一直到鐘仔聲霆囉，我仝款像蜈蚣趖入蚼蟻岫——無法通想。

紲落來考自然，監考老師是阮的主任，考試單分落來，看著題目，我的心肝又閣冷一半，仝款是兩頁滇滇的題目。考試的時陣，我看著全班逐个人攏激一个苦瓜面，我嘛是緊張甲面仔青筍筍，跤手肉咇咇掣，有時仔喙齒閣會相硞。這个時陣全班恬喌喌，干焦聽著鉛筆寫佇紙頂沙沙叫的聲音。我一直毋敢攑頭起來看別的同學，因為主任有講，若是有人頷頸仔伸長長想欲看別人的，明仔載升旗的時陣，主任會請伊上台仔頂跳『迪思可』。

第二工，第一節考數學，第二節考社會，嘛毋知影是按怎，考試的時陣，我一个心肝是嗶噗筅（phi̍h-pho̍k-tsháinn），看著題目，那袂輸雺霧看花，愈看是愈花，我閣用目尾偷捽別的同學，逐个人攏頭犁犁，一肢手寫無停，唉！這个時陣的我，就親像戰敗的相拍雞仔，威風盡失囉！

彼擺考試，我真正有夠漏氣，連前五名嘛無我的份，真正應著人講的「猴山仔嘛會跋落樹跤」，這攏愛怪我家己傷大意，毋過，嘛因為按呢，一直到這馬，逐擺拄著欲考試，我攏會認真準備，毋敢閣摸飛，因為我已經知影——「考試無師傅，認真讀就有」。多謝！勞力！